Sunday, January 07, 2024

家務經理

 <<家務經理>>


今日係最後一日無工人,1 個月前,我以為自己死緊,一早問定外援,結果我覺得完全無問題,外援亦不需要,可能我d 囡已經大個,無年幼小朋友做嘅野確係少好多! 而我做野算有「架步」 比起平時我manage 開嘅工作,慢下來管理家務,基實都幾輕鬆幾療癒,嗰種自動導航不需用腦嘅放空時間, 同時亦感到非常有效率,將一間勁亂勁污糟嘅屋執到好整齊好整齊,有種說不出嘅滿足感,而且呢個工作唔需要同人合作, 唔需要同人溝通,自己一個人都可以做得好好, 簡直就係我呢啲有社恐嘅人嘅Dream Job!亦感到呢個月我自己嘅女性能量好咗好多,皮膚亦都好咗好多, 可能你覺得我咁樣講有啲奇怪,但係Energy 嘅嘢,準過陀飛輪! 


但係我喺度諗,如果我從來未係一個事業女性,亦從來冇做過生意,結咗婚之後一直都係做家庭主婦,我又會唔會真係咁享受呢?情感上我會受到啲乜嘢壓力呢?到底可唔可以做家庭主婦而得到好大嘅自我價值呢? 答案係好難,除非。。。大家明白以下嘅道理! 


女人會同你講愛講感情就算男人遇上不順景變肥甩曬d 頭髮,女人也會不離不棄,而科學證實男性嘅構造只會同你講邏輯同價值,佢揀嘅女人係base on會唔會帶到好處俾佢,例如係肉體上,家庭貢獻上(家務,生小朋友),佢嘅名與利等等(帶出嚟見人唔打得都睇得),呢樣嘢就解釋到點解男人可以同時間愛好多個女人,呢個唔係我講嘅,真係有專業研究報告講架!


但係男人唔明,佢每天可以住係一間乾凈安樂嘅屋,其實係佢事業能夠成功嘅主要元素,能量學上,家庭好就健康好, 先至會運氣好,如果佢每日都一嚿垃圾咁行出街肯定會行衰運! 


好女人唔駛做大事,打理得屋企好,溫婉,嫻淑,微胖,開心,坐喺屋企洗錢(係洗錢唔係洗碗,我無打錯字)已經可以旺夫,女人就好似屋企一件風水擺設咁! 呢件風水擺設係活生生,要養得靚養得好(好似d人玩水晶,戴蜜蠟,種風水竹咁) 你每日掂下佢沾下d 好氣場你就發達! 男人唔該養好d 你屋企件鎮宅之寶,屋企個女人跟你,你養唔好佢你咪丟自己假,咁點會行運呢? 應該話,我見過所有個老婆開心嘅男人都會行運行到落腳趾尾,如果你行衰運,唔駛拜神,拜吓屋企個老婆就得喇! 唔係拜,係寵你個老婆,唔好意思,講錯咗!

記住,老婆唔係屋企嘅家務經理咁簡單,係一件行走嘅風水擺設! 😌

共鳴取暖

 <<共鳴取暖>>


有一段好長嘅時間, 我對於使用社交媒體有好大嘅矛盾,我成日俾人稱為一個好識善用社交媒體去發展事業嘅「人版」,  但係線下,我係一個幾收埋嘅人,雖然線上講嘅嘢都係出自真心,但係你唔會喺線上了解我係一個點樣嘅人。


我覺得Social Media好假,例如以前出席event,會見到好多KOL,我要諗好耐先至認得佢係邊個,因為網上面啲相同佢嘅真人有好大嘅出入,大家都擺自己最好嘅一面喺網上面,現實係我哋有好嘅一面,亦一定有暗黑面,每日睇到呢啲咁靚嘅相,吃喝玩樂嘅美好時光,不禁會增加比較,久而久之,我嗰個有幾萬人嘅page我甚少會update,因為我唔知道自己post嘅嘢會為人哋帶嚟啲乜嘢心理負擔,可能我一個純粹做記錄嘅post,就會令人質疑生活!


以前我哋成日笑,玩Social Media就係最啱鍾意擦存在感嘅人,正所謂「屎唔臭都擺上網」, 自從我冇再做KOL,我嗰個page幾乎荒廢,有時真係幾個月都唔會update一次。(除咗用嚟做生意,我講真,人係要搵食!搵食無問題!)


有一次,我個朋友問我做咩唔再喺嗰度寫嘢,覺得我分享嗰啲嘢好好睇,有時會帶到啲唔同嘅想法甚至係心靈上得到一啲安慰,我諗佢講嗰啲安慰好多時係我講育兒放養唔吹谷小朋友嗰啲,睇咗就特別舒服! 但係有啲咩係一定令人睇咗舒服?又有啲咩係令人睇咗唔舒服嘅呢?如果要咁用腦去諗,不如就將大部份嘅事留返比自己做一啲唔係公開嘅紀錄, 搣甩個啲拆存在感嘅舉動!


我哋都太習慣透過社交媒體去知道朋友嘅近況,呢種無溫度無能量嘅交流,其實係唔係我哋應該繼續嘅呢? 


因為睇咗你個post我以為你OK,但其實OK嗰個只係你嘅外殼 。

因為係你個post 留左言,我以為同你溝通咗,而事實上好多人都冇辦法,透過社交媒體表達自己真實嘅感受。

因為睇咗你個post我以為見過你,而事實上Facebook上面有幾多朋友,我哋已經好耐好耐冇見面?


社交媒體係一個好好嘅平台帶動事業,但係如果我哋繼續依賴呢度去做「社交」, 呢個世界會變成點樣呢?我都要提醒返自己呢度只係一個「媒體」,係接收資訊嘅地方,唔應該係我哋溝通嘅地方,好想擺多啲大家能夠攞到共鳴嘅文章。 因為過得不好,因為軟弱,因為我哋都係有靈性嘅有血有肉嘅人,生命係應該互相憐惜!


過得不好,搵人傾吓,因為好多人都過得不好,不容易,其實大家都等緊大家共鳴取暖!

Sunday, June 27, 2021

LUCA 《盛夏友晴天》

 


出發喇,終於有得去旅行!!! 今次嘅目的地係意大利嘅Riviera沿岸一個美麗港口城鎮, 叫Portorosso~~~~
個度又靚又relax....仲有好多美味嘅海鮮~~~~ 大家一齊合埋眼, 感受一下呢個暑假, 迪士尼動畫 《盛夏友晴天》為你帶來嘅海風~~~
感謝迪士尼嘅邀請我地睇首映, 早前係戲院睇到個trailer, 聽住意大利小島風嘅音樂, 已經好期待呢套電影! 大家都知道迪士尼動畫唔係淨係比小朋友睇,呢套講友情嘅電影, 對於年過40, 經歷好多嘅我, 勾起嘅情緒起伏更大!
首先好鐘意成套戲嘅氣紛, 輕鬆得嚟有D 攪笑! 真係似去咗旅行, 街道嘅片段好靚, 好想去真實嘅Riviera 感受意大利風情,食意大利麵!
戲裡面亦比咗家長好大嘅提醒, 好想小朋友有一個你想要嘅將來? 定係你容許佢揀佢想要嘅將來?「自由」其實係佢地最能成材嘅元素!
其中一幕, 講到Luca 為左自身利益,出賣左好珍惜佢嘅朋友Alberto,人生咁多年來,你有比朋友出賣過嗎?Alberto 好失望,但係佢最後選擇原諒,並成全好朋友嘅夢想!
我地嘅童年影響我地一輩子嘅價值觀,呢個暑假雖然無得飛, 帶你嘅小朋友, 一齊去感受一吓Luca嘅冒險旅程,放開你嘅童年創傷, 學習點樣比一個更有價值嘅童年體驗比你嘅小朋友~~~



Thursday, January 14, 2021

ICQ 功能一覽

我知最近好多人想轉會用其他平台 

係我細心思量同埋做晒research 之後 有一D重大發現 ICQ 真係好誇張, 佢嘅功能如下 

1. Group Max 25000 人 

2.有desktop軟件 

3.可以傳輸145MB file (我唔知MAX幾大, 我試左個PDF 係145MB) 4.手殘都整到sticker, 佢有個sticker bot, 你係個chat send 張相就幫你創做你自己嘅sticker pack 

5.每個message 有得emoji (好似Facebook IG 心心嗰個function) 

6.可以send 原圖 

7.有個function 叫Group video call , free, 仲可以有趣怪sticker 

8.新入group D 人睇到舊嘅message

9.有智能彈出gift, 係input打入關鍵字就有圖彈出!!!  

我係咪發緊夢!!!!!!!